玩具篇——四驅車

        我地細個玩嘅玩具，有好多仍然輕易喺市面上搵到，例如早前介紹過嘅lego、barbie、大富翁。今次介紹嘅，喺玩具反斗城都較難有得買，只有一啲比較舊式嘅模型舖、玩具店先有機會見到，佢就係四驅車。

        四驅車係由日本田宮模型(Tamiya)所生產的汽車模型，比例為1：32。，設計概念係以搖控車為藍本，發展成唔需要搖控器嘅可驅動汽車模型，改以兩粒AA乾電為動力行走。

        四驅車嘅正式比賽規則一般都係鬥快到終點，賽道通常可容納3至5架車。另外，亦都有以完成最多賽道偱環次數的耐力賽，同埋以迷你四驅外型設計評審的比賽。而我地細個嗰時，未必次次玩都有賽道，所以多數都只可以喺屋企樓下嘅空地鬥快。

        最初嘅Comical、Wild等系列的四驅車稱之為Off road，並唔係喺賽道上比賽，所以以越野車嘅設計為藍本，沒有加入側輪，底盤離地比較高，使用釘軑，齒輪亦比較大。而我地細個玩嘅四驅車，即係《四驅兄弟》入面嘅車，係屬於On road嘅Fully Cowled系列，設計上採用左全覆蓋車身、低風阻車殼和細直徑車輪。

        《四驅兄弟》動漫入面，有好多絕招同零件，例如空氣刀、力量推進器、GP晶片等等，現實當然唔可能真係做到同樣效果。我地要改裝，通常只會簡單咁揀一啲較高性能的摩打、較好的齒輪，亦有人會嘗試用前置摩打取代後置依啲方法。

        不過唔適當嘅改裝，雖然會令架車速度加快，但同時會令架車變得無咁穩定，好容易飛出賽道。

        咪以為四驅車熱潮減退就已經無人玩，香港嘅香港迷你四驅車協會依然有定期舉辦活動同比賽，比一眾發燒友切磋同分享心得。

http://www.hkm4a.com/forum/forumdisplay.php?fid=12

我當年最鍾意星馬烈嘅超音號。

你又記唔記得你架四驅車係點嘅樣呢？